Takimi Berisha‑Nano duhet gjykuar në disa këndvështrime që të arrijmë në një konkluzion më real. I parë në aspektin e përgjithshëm, pra si një takim politikanësh, do të ishte një takim normal dhe që nuk ia vlente t'i kushtohet asnjë vëmendje e veçantë, pra edhe unë nuk duhej të humbja kohe me këtë çështje.

Ndërsa duke parë mënyrën, kohën dhe vendin ku u zhvillua, duke pasur parasysh akuzat e rënda që Berisha i ka bërë Nanos deri në korrik 2005 duke e quajtur edhe baron të mafias kriminale, ky takim i ngjan një takimi mafiozësh milionerë.

Nëse Berisha e Nano janë të sinqertë në ato që deklaruan me pompozitet, ata duhej të ishin takuar në mënyrë institucionale, pra të merrnin pjesënë takimet që President Moisiu po bën me përkushtim me partitë politike për zgjidhjen e mosmarrëveshjeve për certifikatat dhe problemet e tjera që lidhen me zgjedhjet.

Mënjanimi dhe injorimi i institucioneve është karakteristike e metodave Berisha‑Nano dhe mënyrë e tyre për të uzurpuar në duart e tyre pushtetin. Unë nuk e di se me çfarëcilësie foli dje Nano me Berishën. Nano nuk është kryetar i Partisë Socialiste, as President.

Nëse Berisha u takua me Nanon si deputet, ia vlen të ritheksohet se Nano ka abuzuar edhe me besimin e zgjedhësve të tij duke e braktisur Parlamentin (edhe pse pagën si deputet me sa kam lexuar e merr të plotë). Vendi i takimit përsëri duket jo normal dhe mbase qëllimisht u zgjodh prej tyre për të përcjellë mesazhet e vërteta të ambicieve dhe pazareve të tyre të rrezikshme.

Kjo dyshe që ëndërron të hipë në zverkun e shqiptarëve edhe për disa vite të tjera, pati guximin që të kapardisen nga ambientet presidenciale dhe të hiqen si shpëtimtarë të vendit. Në fakt kjo dyshe është përgjegjësja e vërtetë për krizën e sotme.

Eshtë e turpshme që çështja e certifikatave, e cila mund të zgjidhet krejt lehtësisht në aspektin teknik, po mban peng progresin e Shqipërisë vetëm për djallëzinë dhe kokfortësinë e Berishës. Por dyshja Berisha‑Nano mund të vijë dhe qëndrojë në pushtet vetëm duke i krijuar kriza e tragjedira Shqipërisë.
Përvoja

Përvoja 16‑vjeçare besoj se me këtë takim publik i ka bindur shqiptarët se në dyshen Berisha‑Nano nuk ka pasur dhe nuk do të ketë gjëra normale dhe në dobi të Shqipërisë. Unë dua të besoj se tani edhe e djathta, edhe njerëzit e ndershëm në Partinë Demokratike, edhe militantët e verbër të Berishës do të kenë aq zgjuarsi që të shohin fytyrën e vërtetë të Berishës.

Takimi i djeshëm ka një të mirë: ai theu edhe mitin e fundit në sytë e militantëve të së djathtës për Berishën. Tashmë Partia Demokratike ka nevojë të zgjedhë liderin e saj, që përfaqëson denjësisht idealet dhe programin e saj. Ndërsa partive të së djathtës po ua përsëris: mos u mashtroni më nga Berisha.

Unë i bëj thirrje të gjitha forcave politike të pozitës dhe opozitës: sa më parë gjeni mirëkuptimin për zgjedhjet dhe i garantoni Shqipërisë zgjedhje të lira, të ndershme dhe në përputhje me rekomandimet e institucioneve ndërkombëtare. Sa më parë çlirojeni politikën shqiptare nga dyshja e rrezikshme Berisha‑Nano. Vetëm atëherë ju do të keni personalitetin tuaj.

Vetëm atëherë një frymë e re e bashkëkohore do të zëjë vend në politikën shqiptare. Unë i bëj apel në mënyrë të veçantë Parlamentit të Shqipërisë: Miratoni ndryshimet e nevojshme në ligjin elektoral, bëjuni mbrojtës të demokracisë dhe jo intrigave të Berishës e Nanos, që synimin e vetëm të tyre nuk kanë interesat e Shqipërisë, por pushtetin dhe pasurimin e tyre dhe të rrethit të gjerë familjar të tyre.

Mesazhi

Së fundi, diçka edhe për ju Berisha‑Nano: Mjaft keni luajtur me fatet e Shqipërisë! Mjaft e keni përgjakur e djegur Shqipërinë! Mjaft e keni zhytur në varfëri dhe errësirë popullin! Ju e bëtë Shqipërinë vendin me qeverinëe më të korruptuar mbase në botë! Ju ia hoqët shume shanse Shqipërisë vetëm për interesat e juaja personale!

Faktet po dëshmojnë dita‑ditës se edhe jeni pasuruar e bërë familje milionerësh! Ju po i vazhdoni pazaret për t?ia zgjatur e dhuruar pushtetin njëri‑tjetrit! Por tashmë edhe shqiptarët duhet të jenë zgjuar! Edhe opinioni ndërkombëtar ju njeh mirë të dyve! Mos guxoni të luani më me zgjedhjet që po vijnë! Koha që ju të ballafaqoheni me të vërtetën dhe me shtetin ligjor nuk do jetë e largët.

Vota e lirë e një populli, që duhet të guxojë më shumë ndaj së keqes, duhet të jetë me 18 Shkurt dhe në të ardhmen edhe ndëshkimi ndaj dyshes Berisha‑Nano!